*Main Sarkari School me Vigyan padhati hoon.*
Kuch din pehle metro station par meri purani chhatra Radha se mulakat hui. Radha udaas lagi.
Maine usse wajah puchi. Radha boli, "Madam, main bahut mehnat karti hoon aur sasural ke har sadasya ka dhyan rakhti hoon. Lekin dukh ki baat ye hai ki mere pati aur parivar ke anya sadasya baar-baar mera mazak udate hain, khaas kar jab main baat-cheet me koi English ka shabd ya vakya bolti hoon."
Maine kaha, "Pyari Radha, main tumhari pareshani samajh sakti hoon. Lekin tumhare pati ko ye samajhna bahut zaroori hai ki unke shabd tumhare aatmavishwas ko kitna nuksaan pahuncha sakte hain."
Radha boli, "Madam, har insaan ki apni bhasha, apni shiksha aur apne bolne ka tareeka hota hai."
Maine kaha, "English achhi hona samajhdari ki guarantee nahi hai, aur English kamzor hona kisi insaan ki kabiliyat ko kam nahi karta."
Maine Radha ko teen mahine ka online English speaking course join karne ki salah di. Isse uski English me baat karne ki kala aur behtar ho jayegi.
Kuch din baad Radha ka phone aaya. Radha boli, "Madam, aapki salah ke liye dhanyavaad. Ab English bolte hue main kam galtiyan karti hoon. Mujhe khushi hai ki main parivar ke sadasyon ki be-wajah ki aalochna se khud ko bacha sakti hoon."
Main apni chhatra Radha ke liye bahut khush hui.
Kya aap bhi chhoti-chhoti baaton par apne jeevansathi ko chhota mehsoos karate hain? Kripya aisa kabhi mat kijiye. Ye aadat aapke aur aapke saathi ke beech ke rishte ke pul ko kamzor kar degi.*
Seekh - Apne jeevansathi ko logon ke saamne chhota karke khud bada mat baniye; use itna surakshit mehsoos karaiye ki woh aapke saamne bina dar ke apni baat keh sake. Is tarah apne saathi ka vishwas jeetiye.
Sukarma Thareja
No comments:
Post a Comment